Суд у Палтаве адмовіўся разглядаць пазоў беларуса-добраахвотніка, які спрабаваў праз суд дабіцца звальненьня з украінскага войска.
Як паведаміла Свабодзе інфармаваная крыніца з вайсковых колаў Украіны, грамадзянін Беларусі прасіў суд прызнаць супрацьпраўным дзеяньне вайсковай частцы аб падпісаньні зь ім кантракту як з грамадзянінам Украіны, а не зь іншаземцам, а таксама абавязаць вайсковую частку звольніць яго з войска.
Грамадзянін Беларусі падпісаў кантракт з Узброенымі сіламі Ўкраіны 24 лютага 2022 году на тры гады. У сакавіку таго году яго залічылі ў сьпісы асабовага складу як рэзэрвіста на пасаду тэхніка стралковай роты. У сакавіку 2023 году яго перавялі на пасаду кіроўцы-электрыка ўзводу стралковай роты.
Праз амаль два гады службы, у траўні 2024 году, беларус падаў рапарт аб звальненьні, але камандаваньне вайсковай часткі адмовілася яго звальняць. У чэрвені 2025 году ён зноў зьвярнуўся з рапартам аб звальненьні, але яго зноў не задаволілі. У вайсковай частцы патлумачылі, што няма падстаў яго падпісаць, паколькі беларус не надаў неабходныя для гэтага дакумэнты, а менавіта — кантракт аб праходжаньні замежнікам вайсковай службы ва Ўзброеных сілах Украіны. У беларуса такога кантракту няма, паколькі зь ім падпісалі дакумэнт, як з грамадзянінам Украіны.
Згодна з украінскім заканадаўствам, з іншаземцамі звычайна падпісваюць кантракт на тэрмін ад аднаго да пяці гадоў. Пры гэтым грамадзянін замежнай краіны можа звольніцца з войска ўжо праз 6 месяцаў бесьперапыннай службы.
Суд вярнуў беларусу пазоў, паколькі той не ўклаўся ў тэрміны, адведзеныя для судовага звароту. Паводле заканадаўства, для абароны правоў аб прыняцьці грамадзян на публічную службу, яе праходжаньне і звальненьне, вызначаны адзін месяц. Такім чынам, грамадзянін Беларусі мог абскардзіць падпісаньне памылковага кантракту ў сакавіку 2022 году.
Грамадзянін Беларусі зьвярнуўся ў суд толькі 23 ліпеня 2025 году. Як адзначыў прадстаўнік беларуса-добраахвотніка, той проста ня ведаў, што зь ім падпісалі неадпаведны для іншаземца кантракт. Ён прасіў суд падоўжыць тэрмін магчымага звароту, аднак суд прызнаў непаважнымі прычыны пропуску звароту і вярнуў пазоў заяўніку.
У той жа час беларус можа абскардзіць гэтую адмову ў апэляцыйным парадку цягам 15 дзён — да канца жніўня.
Што папярэднічала
У сярэдзіне ліпеня Ўпаўнаважаная прэзыдэнта Ўкраіны ў пытаньнях абароны правоў вайскоўцаў Вольга Рашацілава разам з калегамі з Цэнтральнага ўпраўленьня абароны правоў вайскоўцаў Міністэрства абароны зьвярнулася ў Генэральны штаб з заявай аб правядзеньні праверкі абставін залічэньня аднаго грамадзяніна Беларусі і аднаго грамадзяніна Расеі на службу ва ўкраінскім войску.
«Яшчэ ў 2022 годзе мужчыны 1967 і 1981 гадоў нараджэньня вырашылі далучыцца да войска, бо, як самі кажуць, хацелі абараніць краіну, на тэрыторыі якой пражывалі. Аднак замест кантрактаў з замежнікамі зь імі падпісалі кантракты як з грамадзянамі Ўкраіны. Цяпер абодва мужчыны, у прыватнасьці, ня могуць звольніцца з войску, хоць, згодна з часткай 5 артыкулу 26 закону Ўкраіны „Пра вайсковы абавязак і вайсковую службу“, павінны былі мець на гэта права. Апроч таго, праз памылкі, дапушчаныя ў працэсе залічэньня на вайсковую службу, абодва ня могуць атрымаць украінскае грамадзянства», — адзначала Ўпаўнаважаная прэзыдэнта Ўкраіны ў пытаньнях абароны правоў вайскоўцаў.
Згодна зь яе інфармацыяй, грамадзяне Расеі і Беларусі служаць у адной з вайсковых частак тэрытарыяльнай абароны Сухапутных войскаў Украіны.
Апроч праверкі, Вольга Рашацілава ініцыявала стварэньня супольнай з Генэральным штабам працоўнай групы, якая будзе разглядаць кожны выпадак і працаваць над адпаведнымі зьменамі да нарматыўна-прававых актаў.
Пакуль нічога не паведамлялася ні аб выніках праверкі, ні аб выніках дзейнасьці адмысловай працоўнай групы.
Форум